20.09.2021
Цудоўнае свята адзінства на ФМБК
Дзень народнага адзінства працягваецца, і да свята далучыўся факультэт міжнародных бізнес-камунікацый БДЭУ.
Студэнты ФМБК, пры падтрымцы дэкана факультэта Юліі Аляксандраўны Шаўрук, яе намесніка Руслана Ягоравіча Ганчарова і загадчыцы кафедры беларускай і рускай моў Вольгі Мікалаеўны Губскай, падрыхтавалі для гасцей цікавую праграму, прысвечаную Дню народнага адзінства. Там было ўсё: экскурс у гісторыю падзелу Беларусі па ўмовах Рыжскага мірнага дагавора 1921 года, вершы, віктарыны і песні. Акрамя таго, гледачам была прапанавана экспазіцыя друкаваных выданняў Беларусі 1920-1930-х гадоў, якая праводзілася ў рамках праекта Міністэрства інфармацыі Рэспублікі Беларусь “Адзінства народа ? вялікі здабытак”. Арыгінальныя тэксты, напісаныя тарашкевіцай, далі магчымасць удзельнікам мерапрыемства адчуць каларыт той эпохі.
Адзначым, што падчас мерапрыемства выкарыстоўваліся абедзве дзяржаўныя мовы, але перавага ўсё ж была ў беларускай. І такой перавазе ёсць выдатны аргумент – менавіта 17 верасня нарадзіўся класік беларускай літаратуры Максім Танк, выдатны паэт, удзельнік барацьбы за ўз’яднанне беларускага народа, які праз уласны лёс адчуў боль раз’яднанага “рыжскай мяжой” беларуса. З гэтай нагоды студэнты 2 курса Варвара Мольцан і Арцём Герасімаў прачыталі верш “Здарова, таварышы”, напісаны паэтам адразу пасля аб’яднання беларускіх зямель у 1939 годзе.
Студэнты з задавальненнем узялі ўдзел у віктарыне, якая патрабавала ведання спрадвечнай беларускай лексікі. Дарэчы, ці ведаеце вы, што зорка, якая падае, па-беларуску завецца “знічка”? Не адмовіліся студэнты і ад прапановы “расчытаць беларускія сімвалы”.
Але, бадай, самы кранальны момант свята – гэта ўспаміны і цікавыя факты, звязаныя з рознымі куткамі нашай Радзімы, якімі шчыра падзяліліся з аўдыторыяй выкладчыкі і студэнты. Насамрэч, у кожным горадзе, у кожнай вёсцы Беларусі ёсць штосьці асаблівае, ад прыгожага парку да цудоўнага паху шакаладу на вуліцах…
Выдатным заканчэннем свята стала, канешне, песня. Нашы студэнты Аляксандра Соп і Георгій Лаўрэнаў выканалі “Гісторыю майго жыцця” гурта Naviband, а сябры з задавальненнем іх падтрымалі.
Менавіта дзякуючы такім цудоўным момантам разумееш, што сапраўднае народнае адзінства – у шчырых адносінах з роднымі, сябрамі, калегамі, аднакурснікамі. Адзінства ? у сэрцы кожнага з нас.
Тел.: (+375 17) 209-88-16,
факс: (+375 17) 368-01-60
ПРИЕМНАЯ КОМИССИЯ
Тел.: (+375 17) 209-88-99