23.09.2022

Дзень роднай мовы на ФКТІ

На факультэце камерцыі і турыстычнай індустрыі 22 верасня прайшоў Дзень беларускай мовы! Студэнцкі савет ФКТІ падрыхтаваў шмат цікавых конкурсаў, а самае галоўнае — страў па рэцэптах беларускай кухні.

Асаблівую актыўнасць праявілі першакурснікі, якія запоўнілі балкон другога паверха — традыцыйнае месца для факультэцкіх мерапрыемстваў. Таксама знайшлося і шмат аматараў роднай мовы на старэйшых курсах.

Разгадваючы крыжаванку "Мая Беларусь", студэнты ўспомнілі — а хтосьці даведаўся — пра святы, традыцыі, музеі і славутасці Радзімы.

Многія праявілі сябе ў арфаграфічна-пунктуацыйным спаборніцтве, у конкурсе на веданне партрэтаў і сапраўдных імёнаў плеяды беларускіх пісьменнікаў і паэтаў: У.Караткевіча, Я.Коласа, Я.Купалы, Р.Барадуліна. За правільныя адказы разумнікі частаваліся хатнім хворастам і іншымі ласункамі.

А яшчэ студэнтам прапанавалася пакінуць цёплыя пажаданні на роднай мове на вялізным аркушы паперы ў памяць аб гэтым вясёлым і карысным дні.

Шануйце родную мову і памятайце словы Ф.Багушэвіча: "Не пакідайце ж мовы нашай беларускай, каб не ўмёрлі".