БЕЛАРУСКI ДЗЯРЖАЎНЫ
ЭКОНАМIЧНЫ ЎНIВЕРСIТЭТ

Натхнёныя рэспубліканскай акцыяй «Ад усёй душы» студэнты ІСГА сустрэліся з Інэсай Георгіеўнай Кулаго. Яна ўжо шмат гадоў з'яўляецца старшынёй Завадской раённай арганізацыі грамадскага аб'яднання "Беларуская асацыяцыя былых непаўналетніх вязняў фашызму". Студэнты БДЭУ прыйшлі пажадаць ёй здароўя і сіл, а ў адказ пачулі сустрэчнае: "Мы не павінны забываць той вайны, тое, што перажылі нашы бацькі, нашы бабулі... хай больш ніколі не паўторыцца!".

Інэса Георгіеўна падзякавала студэнтам за навагоднія падарункі, пачаставала ўсіх гарбатай і расказала пра тое, што ёй давялося перажыць: «Я была ў Германіі. У 43 годзе мне было 3 годзікі, калі забралі мяне, маму і маю сястрычку. Яна была на два гады старэйшая і, вядома, больш памятала. А я... ну, што можа трохгадовае дзіця памятаць? Выганялі працаваць на завод, голад вядома даймаў. Прыехалі дадому - скура ды косці. Тая вопратка, што засталася, пасля апранала толькі на ляльку... Я памятаю канец вайны. Наадварот праз дарогу былі домікі, немцы там жылі, не ўсе фашысты былі. Мы падыходзілі да дроту і яны кідалі нам хоць тую бульбіну ці кавалачак хлеба... А ў лагеры немец ужо на вышцы адвернецца і зробіць выгляд, што ён не бачыць, як мы кідаемся да дроту, што-небудзь схапіць... Але затое быў у лагеры паліцай, ён да ежы падыдзе і растопча нагою ў нас на вачах, а мы плачам і выскрабаем, што засталося з зямлі. Успамінаць, вядома, гэта страшна…».

Студэнты ІСГА абмяняліся з Інэсай Георгіеўнай нумарамі тэлефонаў і папрасілі тэлефанаваць ім, калі што-небудзь спатрэбіцца.