БЕЛАРУСКI ДЗЯРЖАЎНЫ
ЭКОНАМIЧНЫ ЎНIВЕРСIТЭТ

1 лютага 2023 года адбылося ўрачыстае адкрыццё інавацыйнай пляцоўкі кафедры тэорыі і гісторыі права факультэта права Беларускага дзяржаўнага эканамічнага ўніверсітэта на базе Нацыянальнага цэнтра прававой інфармацыі Рэспублікі Беларусь.

Інавацыйная пляцоўка створана з мэтай павышэння якасці падрыхтоўкі юрыдычных кадраў за кошт узмацнення практыка-арыентаванага складальніка адукацыйнага працэсу пры дапамозе эфектыўнага выкарыстання вопыту супрацоўнікаў НЦПІ і яго матэрыяльна-тэхнічнай базы.

Адкрыццё інавацыйнай пляцоўкі прымеркавана адразу да дзвюх юбілейных дат: 90-годдзя ўніверсітэта і 25-годдзя факультэта права. Замацавалі супрацоўніцтва дэ-юрэ подпісы намесніка дырэктара НЦПІ Вячаслава Мечыслававіча БЕКЕТЫ і рэктара БДЭУ, доктара юрыдычных навук, Аляксея Уладзіміравіча ЯГОРАВА.

Вячаслаў Мечыслававіч Бекета:

«НЦПІ, БДЭУ і факультэт права звязваюць даўнія сяброўскія адносіны, і мы заўсёды падтрымліваем ініцыятывы ўніверсітэта, пастаянна выступаем партнёрамі тэматычных канферэнцый і конкурсаў. Мы цэнім нашае эфектыўнае супрацоўніцтва і спадзяемся, што яно будзе развівацца: інавацыйная пляцоўка дапаможа зблізіць тэарэтычную навуку і практыку, а інструменты лічбавых рэсурсаў дазволяць вырасціць на факультэце права высакакласных юрыстаў – прафесіяналаў сваёй справы».

Вячаслаў Мечыслававіч таксама падкрэсліў, што выпускнікі БДЭУ - дастойныя прадстаўнікі кадравага складу НЦПІ, а выкладчыкі універсітэта - пастаянныя аўтары навукова-практычнага часопіса «Право.by».

Аляксей Уладзіміравіч Ягораў:

«Пры навучанні нашых будучых спецыялістаў мы рэалізуем канцэпцыю «хто валодае інфармацыяй - той валодае светам». Інавацыйная пляцоўка НЦПІ не толькі дасць неабходную інфармацыю для фарміравання прафесійных кампетэнцый, але і дапаможа адаптаваць яе ў адносінах да сучасных умоў».

Дэкан факультэта права Аляксандр Мікалаевіч ШКЛЯРАЎСКІ і загадчык кафедры тэорыі і гісторыі права Вольга Вітальеўна БАДАКОВА адзначылі, што супрацоўніцтва НЦПІ і БДЭУ заключаецца таксама і ў абмене кадрамі: лепшыя выпускнікі факультэта змогуць працаваць у Цэнтры па размеркаванні, а студэнты - праходзіць вучэбна-азнаямленчую практыку . Акрамя таго, запланаваны экскурсіі для студэнтаў, павышэнне кваліфікацыі выкладчыкаў факультэта права і супрацоўнікаў універсітэта ў НЦПІ, прыцягненне супрацоўнікаў Цэнтра для рэцэнзавання дыпломных работ і магістарскіх дысертацый, а таксама шэраг сумесных навуковых мерапрыемстваў. У сваю чаргу студэнты факультэта права – госці мерапрыемства – падзякавалі кіраўніцтву ўніверсітэта і Цэнтра за магчымасць доступу да прававых сістэм у рамках навучальных дысцыплін, што дазволіць будучым юрыстам паспяхова развівацца ў сваёй прафесійнай сферы.

На цырымоніі ўрачыстага адкрыцця Аляксей Уладзіміравіч Ягораў і Вячаслаў Мечыслававіч Бекета падпісалі шэраг дакументаў: Палажэнне аб інавацыйнай пляцоўцы кафедры тэорыі і гісторыі права факультэта права Беларускага дзяржаўнага эканамічнага ўніверсітэта; Палажэнне аб цэнтры эталоннай прававой інфармацыі; Дагавор паміж Нацыянальным цэнтрам прававой інфармацыі Рэспублікі Беларусь і Беларускім дзяржаўным эканамічным універсітэтам аб прадастаўленні Беларускаму дзяржаўнаму эканамічнаму ўніверсітэту права выкарыстання базы даных - інфармацыйна-пошукавай сістэмы "ЭТАЛОН-ONLINE" на бязвыплатнай аснове.

Цэнтр прававой інфармацыі на базе кафедры тэорыі і гісторыі права факультэта права - гэта камп'ютарныя класы, аснашчаныя сучасным абсталяваннем з устаноўленымі на ім інфармацыйна-прававымі сістэмамі ЭТАЛОН-ONLINE, а таксама магчымасцю доступу да дзяржаўных інфармацыйна-прававых рэсурсаў. Акрамя таго, Цэнтр абсталяваны стэндамі, на якіх размешчана карысная наглядная інфармацыя аб інструментах і алгарытмах працы з прававой сістэмай ЭТАЛОН-ONLINE, а таксама інфармацыя аб дзейнасці НЦПІ.