БЕЛАРУСКI ДЗЯРЖАЎНЫ
ЭКОНАМIЧНЫ ЎНIВЕРСIТЭТ

10 лютага на факультэце міжнародных эканамічных адносін было арганізавана душэўнае мерапрыемства "New Year Traditions", прысвечанае святкаванню Новага года ў Беларусі і Кітаі.

«У нашай краіне адзначалі Новы год паўтара месяцы таму, а Новы год у Кітаі будуць святкаваць да 12 лютага, і пачаць новы семестр мы вырашылі з агульнага свята для беларускіх і кітайскіх студэнтаў. Сёння актыў факультэта і іх таварышы з Кітая сустрэліся, каб павіншаваць адзін аднаго і расказаць пра навагоднія традыцыі сваёй краіны. Такія мерапрыемствы дапамагаюць пасябраваць з замежнымі студэнтамі, спрыяюць іх адаптацыі», - адзначыла дэкан ФМЭА Аксана Мікалаеўна ШКУЦЬКО.

Актыўныя студэнты ФМЭА на бездакорнай англійскай мове расказалі студэнтам з Кітая аб тым, як святкуюць Каляды і Новы год у Беларусі, чаму ў нас асабліва любяць зімовыя святы і якія павер'і звязаны з імі, а таксама адзначылі, што ў нашай культуры ёсць не толькі Дзед Мароз , але і аўтэнтычны персанаж беларускага фальклору – Зюзя Паазерскі.

Студэнты з Кітая, у сваю чаргу, прадставілі аднакурснікам сімвалы Усходняга гараскопа, расказалі пра існуючыя старажытныя традыцыі і святочныя стравы кітайскай кухні, навучылі нашых студэнтаў складаць віншаванні, выкарыстоўваючы сапраўдныя кітайскія іерогліфы! І, вядома, не абышлося без салодкага стала, а студэнты ФМЭА ўжо рыхтуюць для таварышаў з Кітая сюрпрыз: святкаванне Масленіцы!