БЕЛАРУСКI ДЗЯРЖАЎНЫ
ЭКОНАМIЧНЫ ЎНIВЕРСIТЭТ

24 лютага на базе БДЭУ адбыўся Міжнародны круглы стол "Духоўна-маральнае выхаванне абаронцы Айчыны як аснова згуртаванасці нацыі ва ўмовах сучасных выклікаў". У ім прынялі ўдзел прадстаўнікі Рэспублікі Беларусь, Расійскай Федэрацыі і Рэспублікі Казахстан. Студэнтам БДЭУ ўдалося не толькі пачуць выступленні спікераў тэлемоста, але і задаць ім свае пытанні.

Нягледзячы на тое, што тэлемост аб'яднаў спікераў з розных куткоў нашай планеты, - адпраўной кропкай для яго стаў Дзень абаронцаў Айчыны, які прайшоў напярэдадні. «Шаноўныя мужчыны! Далучаемся да ўсіх віншаванняў, якія гучалі і працягваюць гучаць на ваш адрас, - звярнулася да ўдзельнікаў сустрэчы мадэратар, старшыня Завадской раённай арганізацыі г.Мінска РГА «Белая Русь» Святлана ЛЯАНЕНКА. - У Год міру і тварэння гэтая дата мае для нас адмысловы сэнс. Усім нам мірнага неба над галавой і невычэрпнай стваральнай энергіі на карысць Айчыны!» Спачатку было вырашана высветліць, хто ж такія абаронцы Айчыны. Абаронцы Айчыны - гэта людзі, гатовыя абараняць нас і нашы рубяжы. «Мы найперш абараняем сваю дзяржаву, сваю Радзіму, тое, што дасталася нам ад продкаў. Абараняем сваю сям'ю, сваё права на вучобу, на жыццё, на працу, на магчымасць смела глядзець у будучыню», - сказаў намеснік старшыні Рэспубліканскага грамадскага аб'яднання «Белая Русь» Андрэй БАСАК. Нацыянальная бяспека важная заўсёды, але сёння гэтая тэма асабліва актуальная. «У Рэспубліканскага грамадскага аб'яднання шмат задач, сярод якіх і палітычная асвета грамадзян, павышэнне духоўна-маральнага ўзроўню насельніцтва, умацаванне духу патрыятызму і нацыянальнай самасвядомасці, - згадала ў сваім выступе старшыня Менскай гарадской арганізацыі РГА «Белая Русь» Наталля ВАРОНАВА. - Таксама мы займаемся фармаваннем у моладзі актыўнай грамадзянскай пазіцыі, арганізуем мноства праектаў». Далей размова перайшла да служэння, як да працы на карысць Айчыны. Протаіерэй, настаяцель храма Георгія Перамаганосца г. Мінска Аляксандр СТРАХА распавёў пра тое, як царква ставіцца да ваеннага служэння, параіў рэалізоўваць увесь свой патэнцыял на карысць радзімы і быць удзячным: «Памятайце пра студню, якую не варта забруджваць, таму што вы з яе п'яце і будзеце піць у будучыні». Удзялілі ўвагу ўдзельнікі тэлемоста і выступленням ваеннага камісара камісарыята Магілёўскай вобласці Аляксандра Гарашкіна, намесніку старшыні Гомельскай вобласці РГА "Белая Русь" Святлане Вараніцы. Яны казалі аб прэстыжы вайсковай службы і захаванні гістарычнай памяці. Старшыня Рэспубліканскага Савета "Беларускі саюз афіцэраў" Сяргей Бабрыкаў выказаўся наконт узросту пачатку патрыятычнага выхавання дзяцей.

Удзельнікі тэлемоста з Расійскай Федэрацыі і Рэспублікі Казахстан прадэманстравалі яркія патрыятычныя ролікі і актыўна ўключыліся ў абмеркаванне заяўленай тэмы. Яны былі адзіныя ў тым, што ў сістэме духоўнасці вайскоўцаў варта вылучаць такія каштоўнасці, як патрыятызм, грамадзянскасць, дзяржаўнасць, воінскі абавязак, адказнасць, сумленне і прафесіяналізм. Духоўныя каштоўнасці застаюцца актуальнымі, бо любоў да сваёй краіны, традыцый закладваецца з дзяцінства. Чалавек, які не ведае гісторыі сваёй Айчыны, горада, звычаяў роднай зямлі, не можа вырасці патрыётам сваёй радзімы. Мы свята захоўваем памяць нашых бацькоў і дзядоў і шануем сваіх абаронцаў.